Ronja er ein rættulig ránsmansdóttir. Tó veit hon ikki, at pápi hennara er ránsmaður, og heldur ikki, hvat ein ránsmaður er. Hon veit, at hon skal ansa sær fyri øllum vandunum, ið eru - tí tað hava foreldrini sagt henni.

At tað eru nógvir vandar í heiminum lærir hon skjótt, men at vera bangin er býtt, tí tá verður alt vandamikið. Hvussu skal hon læra heimin at kenna, um hon er bangin? Og hvat nú, um ikki alt er so, sum foreldrini hava sagt?  

Ronja torir at fara út í heimin og á henda hátt síggja, at alt ikki er so svart/hvítt sum hini søgdu. Hon ger sær nakrar royndir í lívinum, og við teimum sum barlast klárar hon at taka støðu og vera við til at broyta tann heimin, hon livir í.

Ronja varð fødd eina illveðursnátt við torusláttri og snarljósi. Hetta ger at borgin hjá Mattasi, pápa Ronju, fer í tvíningar. Nøkur ár seinri fær Mattas at vita, at fíggindi hansara, Borka, er fluttur inn í hin partin av borgini saman við ránsmonnum sínum. Mattas verður í øðini og setur sær fyri at reka teir út. Men tá finnur hann útav at Ronja og Birk, ið er sonurin hjá Borka, eru blivin góðir vinir og tað ger ikki støðuna betri …….

Tað er Astrid Lindgren, ið hevur skrivað søguna um Ronju og Birk, meðan tað er Sebastian, ið hevur gjørt tónleikin.

Eyðun Johannessen er leikstjóri, og Edward Fuglø ger pall og búnar, ið saman við uml. 70 fólkum, føra okkum inn í eina ævintýrverð, har vit bæði møta ránsmonnum, villvætrum, rumpunissum, grádvørgum og fleiri.